குறிப்புகள் பலவிதம்: சளியை விரட்டும் சின்ன வெங்காயம்

• எந்தவகை கீரைப் பொறியல் செய்தாலும் வதக்கும்போது இரண்டு சிட்டிகை சர்க்கரையைச் சேர்த்தால் ருசி அதிகமாவதுடன் பச்சை நிறமும் மாறாது.
• பழுத்த, தோல் கறுத்த பழங்களை வீணாக்காமல் மசித்து கோதுமை மாவு, சர்க்கரை, சிறிதளவு சமையல் சோடா சேர்த்துத் தண்ணீர் விட்டு எண்ணெய்யில் போட்டுப் போண்டாவாகப் பொரித்தெடுத்துச் சாப்பிடலாம்.
• கற்பூர டப்பாவில் பத்து மிளகுகளைப் போட்டுவைத்தால் கற்பூரம் காற்றில் கரையாது.
• பாத்திரம் தேய்க்கும் சிங்க், வாஷ்பேசின், வீட்டின் மூலை முடுக்குகளில் குழந்தைகள் எடுக்காத வகையில் பாச்சை உருண்டைகளைப் போட்டுவைத்தால் கரப்பான் போன்ற பூச்சிகள் வராது.
• டீத்தூளுடன் கொஞ்சம் ஏலக்காயைத் தட்டிப்போட்டுக் கலந்துவைத்தால் டீயின் மணம் தூக்கலாக இருக்கும்.
• மார்கழி மாதம் கோலம் போடும்போது கலர் பவுடருடன் சலித்த மணலைக் கலந்து போட்டால் கோலம் எடுப்பாக இருக்கும்.
• தினம் ஒரு சின்ன வெங்காயத்தைத் தோலுரித்துச் சாப்பிட்டுவந்தால் சளி பிடிக்காது.